ZAZZAU EMIRATE ASSURES KACHMA OF TOTAL SUPPORT FOR IMPROVED HEALTH CARE

Zazzau emirate assured kadchma of total supports for health care KANUN LABARI: MASARAUTAR ZAZZAU TA TABBATAR DA CIKAKKEN GOYON B...

Zazzau emirate assured kadchma of total supports for health care

KANUN LABARI: MASARAUTAR ZAZZAU TA TABBATAR DA CIKAKKEN GOYON BAYANTA GA KADCHMA DOMIN INGANTA KIYAYE LAFIYA

Masarautar Zazzau ta tabbatar wa Hukumar Kula da Tsarin Inshorar Kiwon Lafiya ta Jihar Kaduna, wato KADCHMA, cikakken goyon baya da haɗin kai domin ganin an cimma nasarar ƙoƙarin Gwamnatin Jihar Kaduna na inganta harkokin kiwon lafiya a faɗin jihar.

Mai Martaba Sarkin Zazzau, Ambasada Malam Ahmad Nuhu Bamalli, ya bayyana haka ne a yayin wani taron tuntuba da dabarun wayar da kai da ya haɗa shi da Hakimai 31 na Masarautar Zazzau da manyan jami’an masarautar, tare da jami’an KADCHMA da abokan hulɗar ci gaba.

Sarkin Zazzau ya bayyana cewa kiwon lafiya na daga cikin muhimman abubuwan da ɗan Adam ke buƙata a rayuwarsa, inda ya ce KADCHMA ta ziyarci fadar masarautar sau da dama domin wayar da kan al’umma kan muhimmancin shiga tsarin da kuma fa’idodin da ke tattare da shi.

Mai Martaba Sarkin ya umarci dukkan Hakimai 31 da sauran masu hali a cikin masarautar da su bayar da cikakken goyon baya tare da ƙarfafa mutane da su yi rajista cikin shirin, domin rage yawan kashe kuɗaɗen aljihu da mutane ke yi wajen neman magani.

Ambasada Ahmad Nuhu Bamalli ya bayyana cewa mutane da iyalansu kan kashe makudan kuɗaɗe a duk wata wajen kula da lafiyarsu, amma kafa KADCHMA ya zo da tsarin da zai sauƙaƙa wa al’umma samun kiwon lafiya ta hanyar biyan kuɗin rajista na shekara-shekara.

Mai Martaba Sarkin ya kuma nuna goyon bayansa ga shirin ta hanyar yin rajistar mutane kusan 100 daga cikin ma’aikatan masarautar. Haka kuma, KADCHMA ta bai wa Masarautar Zazzau damar yin rajistar mutane 1,000 kyauta daga cikin al’ummomin da ke ƙarƙashin Hakimai 31 na masarautar.

Tun da farko, Darakta-Janar na KADCHMA, Alhaji Abubakar Hassan Dujiman Jama’a, ya yaba da irin gudunmawar da Mai Martaba Sarkin Zazzau ke bayarwa wajen ganin shirin ya yi nasara, yana mai cewa ba za a iya ƙididdige muhimmancin ƙoƙarinsa ba.

Alhaji Abubakar Hassan ya ce a ko da yaushe ƙofar fadar Mai Martaba Sarkin Zazzau a buɗe take ga KADCHMA, yana mai cewa irin wannan haɗin kai zai taimaka wajen kai shirin ga jama’a a matakin ƙananan hukumomi da ƙauyuka.

Ya bayyana cewa KADCHMA wani tsari ne da ake tara gudunmawar kuɗi domin biyan kuɗin ayyukan kiwon lafiya ga mazauna Jihar Kaduna. Ya ƙara da cewa Gwamna Malam Uba Sani ya sha nanata kudirinsa na inganta harkokin kiwon lafiya, yayin da shirin KADCHMA ke biyan kuɗin ayyukan kiwon lafiya da ake bai wa waɗanda suka yi rajista a cibiyoyin kiwon lafiyar da suka zaɓa.

A jawabansu daban-daban, wakilan abokan hulɗar ci gaba da suka halarci taron sun bayyana irin gudunmawar da suke bayarwa a fannoni daban-daban, musamman a harkokin rigakafi, kula da iyali da sauran shirye-shiryen kiwon lafiya.

Ɗaya daga cikin abokan hulɗar ci gaban, Alhaji Garba Shehu, ya shaida wa wakilinmu cewa tawagarsu za ta yi aiki kafada da kafada da Masarautar Zazzau domin cimma manufofin shirin da kuma tabbatar da cewa wayar da kan jama’a ta isa ga al’ummomi a faɗin masarautar.

Taron ya kuma gudana ne da ƙaddamar da Kwamitin Kiwon Lafiya na Masarautar Zazzau da Mai Martaba Sarkin Zazzau, Ambasada Ahmad Nuhu Bamalli, ya yi, inda ya buƙaci kwamitin da ya tabbatar da gaggauta ɗaukar matakai da kuma ingantaccen haɗin gwiwar ayyukan kiwon lafiya a cikin masarautar.

A ƙarshen taron, jami’an KADCHMA sun kai ziyara kasuwar Sabon Garin Zaria, inda aka buɗe sabon ofishin KADCHMA domin sauƙaƙa wa jama’a samun damar yin rajista da kuma ƙara wayar da kan al’umma game da tsarin.

Wakilinmu, Mikail Ibrahim Fagachi, ya ruwaito.