Tasirin Zarge-zargen Cin Hanci Kan Makomar Siyasar Bauchi

Daga Usman Dahiru, Bauchi.  Daga yadda rahotanni da zarge-zargen da ke alaƙa da rashin gaskiya ke ci gaba da fitowa dangane da t...

Daga Usman Dahiru, Bauchi. 

Daga yadda rahotanni da zarge-zargen da ke alaƙa da rashin gaskiya ke ci gaba da fitowa dangane da tsohon jami’in NAPIMS, Bala Wunti, wanda ake alakantawa da zargin cin hanci da rashawa a lokacin da yake ofis, al’ummar Jihar Bauchi na ƙara fahimtar irin siyasar da aka dade ana yi a kansu: siyasa wadda ke amfani da mulki a matsayin kariya daga bincike, kuma a matsayin hanyar kare muradu na kai.

Zarge-zargen da ke nuna yunƙurin amfani da jam’iyyun siyasa da kusanci da masu iko domin kauce wa yin hisabi ba abin mamaki ba ne ga masu bibiyar siyasar Bauchi. Tun da daɗewa akwai alamun cewa wasu mutane na ganin siyasa a matsayin mafaka ta kariya maimakon dama ta yi wa jama’a hidima.

Abin baƙin ciki ne matuƙa cewa tattaunawa kan burin siyasa da rabon mukamai na faruwa a daidai lokacin da talakawa ke fama da fatara, rashin tsaro, rashin aikin yi da tsananin wahalar rayuwa. Maimakon mayar da hankali kan yadda za a inganta rayuwar jama’a, wasu ‘yan siyasa sun fi mayar da hankali kan amfani da tasirin siyasa wajen kare kansu.

Bayyanar wani sautin murya da aka ce ya fito daga wani ɗan siyasa mai suna Mahmoud Dan Larabawa yana tattaunawa da shugaban jam’iyyar APC na ƙasa, Nentawe Yilwatda, inda ake zargin suna tattauna yadda za a rufe batun da ya shafi Bala Wunti, abin kunya ne kuma abin takaici ga duka bangarorin biyu.

Abin da ya fi tayar da hankali a cikin wannan tattaunawa da aka fitar ba wai batun shigowar Bala Wunti APC ba ne kawai, sai dai yadda ake ganin ana yin ƙoƙarin samar masa wata kariya ta musamman a ɓoye, wata mafaka ta siyasa daga tambayoyi da binciken da ke tattare da zarge-zargen cin hanci. Wannan lamari ya sake bayyana yadda wasu suka mayar da siyasa hanya ta kauce wa hisabi maimakon yi wa jama’a hidima.

Abin damuwa ne matuƙa cewa ana ƙoƙarin mayar da jam’iyyar mulki ta zama mafaka ga mutane da ke fuskantar bincike mai tsanani. Idan mutum yana fuskantar manyan zarge-zarge da suka shafi dukiyar jama’a, abin da ya dace shi ne ya fito fili ya kare kansa ta hanyar gaskiya da bin doka, ba neman mafaka a jam’iyyar siyasa ko dogaro da kariyar manyan mutane ba.

Wannan ba siyasa ba ce; cin amanar jama’a ce. Cin amanar dubban matasa marasa aikin yi ne. Cin amanar iyalai da ke fama da yunwa da wahala ne. Sama da komai, cin amanar al’ummar Bauchi ne da ke buƙatar shugabanci mai gaskiya, rikon amana da gaskiya.

Abin da ya fi ƙara tayar da hankali shi ne yadda ake ganin ana ƙoƙarin nuna cewa ana yin wasu manyan shirye-shirye daga sama domin tabbatar da wannan buri na siyasa. Amma ya kamata a fahimta sarai cewa al’ummar Bauchi masu wayewar siyasa ne, kuma ba za su amince da shugabanci da aka gina kan zargi, kariyar siyasa da amfani da iko wajen guje wa bincike ba.

Kuma a fahimtarmu, Bola Ahmed Tinubu ba shi da wani zaɓi illa ya mutunta ra’ayi da zabin al’ummar Bauchi. Bauchi ba ta mallakar wani mutum ko ƙungiyar siyasa da za ta zauna a bayan fage ta yanke shawarar wanda zai shugabanci jihar. Ikon zaɓe na hannun talakawan Bauchi ne, ba na masu shirya siyasa a ɓoye ba.

Al’ummar Bauchi na ƙara wayewa. Sun fara fahimtar bambanci tsakanin shugabanci na gaskiya da burin siyasa da aka gina kan neman kariya. Lokaci ya yi da jama’a za su haɗa kai su zaɓi shugaba mai gaskiya, adalci, tausayi da riƙon amana—wanda zai fifita bukatun jama’a sama da kare muradun masu iko.

Haka kuma, shugaban jam’iyyar APC na ƙasa, Nentawe Yilwatda, yana da manyan tambayoyi da ya kamata ya amsa. Jam’iyyar mulki bai kamata ta zama mafaka ga masu kokarin gujewa bincike ko neman kariyar siyasa ba. Aikin shugaban jam’iyya shi ne kare martaba da mutuncin jam’iyya, ba shiga ayyukan da ka iya rage amincewar jama’a da ita ba.

Idan har ana amfani da APC wajen shirya kariyar siyasa ga mutane da ke fuskantar bincike, to hakan babban cin amanar jam’iyyar ce da kuma dimokiraɗiyyar Najeriya baki ɗaya. Kuma idan shugabancin jam’iyya ba zai iya kare martabar tsarin siyasa ba, to akwai dalilin tambayar ko irin wannan shugabanci ya cancanci ci gaba da rike mukami.

A yau, abin da al’ummar Bauchi ke so ba siyasar ɓoye-ɓoye ba ce, ba siyasar kariya ba, ba kuma siyasar amfani da talakawa don cimma buri na kai ba. Abin da suke nema shi ne shugabanci da aka gina kan gaskiya, adalci da riƙon amana. Kuma duk wanda har yanzu bai fahimci cewa zamani ya sauya ba, zai fuskanci wannan gaskiyar a ƙarshe.